Custom Search
التكعيبة: Apr 15, 2010

Thursday, April 15, 2010

اليوم أكتب لي

- لماذا توقفت عن الكتابة؟....إنشغلت؟...و لا مفيش حاجة تكتبها؟.....و لا كبرت دماغك؟
طب تعالي ناخدها كده واحده واحده، ما كملتش ليه تدوينتك الأخيرة؟.....رد ما بتردش ليه؟
.................................ما تتكلم!!!!
- إممم بصراحة؟
- أكيد، ماتعودتش عليك غير كده.
- جميع ما سبق، أنا مشغول جدا و مفيش حاجة أكتبها لأني كبرت دماغي و مش ناوي أكمل التدوينة اللي فاتت
- تصدق إجابة مفاجئة!! لا يا شيخ؟!!! و ليه كل ده؟
- أنا مشغول بتلاتين حاجة بعملها في نفس الوقت زائد تلاتين مليون حاجة بفكر فيها. و كبرت دماغي منك مش من حاجة تانية، يعني من الاخر كده أنت اللي زهقتني.
- أنا؟...هانت عليك العشرة؟!! بعد 21 سنه تكلمني كده.....يا خيبتي فيك.
- إهدي بس علي، و ما تلهينيش كده....إنت عايزني أرجع أكتب تاني؟
- أيوه
- طيب خلاص إتفضل إديني وقت و إتنازل عن حاجة من التلاتين اللي انت ساحلني فيهم و أنا أرجع أكتب تاني.
- بس كده؟ طب ديه بسيطه جدا...الموضوع ترتيب أولويات و إحنا شاطرين جدا في ده، ليك علي يا سيدي الفترة الجاية هتنازل عن حاجة في روتينا الاسبوعي عشان تبقي تكتب و لو مرة واحدة أسبوعيا، إتفقنا؟
- ممتاز، بس ممكن أعرف إنت مصًر ليه كده إني أرجع أكتب تاني؟
- إحنا هنضحك علي بعض؟...ماحنا طول عمرنا هاويين الموضوع ده و أفكرك كمان بالفترة اللي كنت بتحلم أيامها باليوم اللي تحترف فيه الكتابة....أفكرك؟
- لا لا الله يخليك ما تحرقش الموضوع ده خليه في تدوينه تانيه
- حلو يعني نويت ترجع تكتب تاني؟
- :) :) أيوه يا سيدي
- هو ده الواد أبو قلب أبيض اللي أنا أعرفه :) بس برضه ما قولتليش؟ إنت مش ناوي تكمل التدوينة اللي فاتت ليه؟
- ما تصيعش بقي!! مانت عارف
- طب مانت كمان عارف أنا بنسي إزاي
- لا يا باشا انت بتتناسي مش بتنسي بس هقولك عشان انا عارفك زنان
- يا سيدي التدوينة اللي فاتت كانت كلها إسقاطات علي ناس أنا مش عايز حتي أفتكرهم دلوقتي فقررت إني ماكملهاش
- أيوه أيوه إفتكرت..ييييييييه ليه فكرتني
- مش إنت اللي زنان
- خلاص خلاص...الناس ديه ما تستاهلش فعلا و الخائن لا يستقيم له خلقا..كبر دماغنا
- مانا قولتلك إني كبرتها عشان كده بلاش نتكلم في الموضوع ده تاني
- خلاص طالما إتفقنا نرجع نكتب تاني
- قولي بقي..ناوي تكتب عن إيه؟
- بص هو أنا ناوي أركز شوية علي موضوع المدونة، بمعني هكتب مشاهداتي العامة اللي من خلالها تقدر تشوف وجهه مصر بدون مكياج زي مانا شايفه، ماهو أنا أصلي إبنها و أقرب واحد بشوفها كده
- ممتاز جدا، بالتوفيق
- متشكر يا صديقي العزيز، هستني رأيك...إنت عارف رأيك مهم عندي إزاي
- أكيد....بس أنا عندي إستفسار صغير، مين البهوات و الهوانم اللي بيقروا دول؟؟؟!!! هما ماشفوش العنوان "اليوم أكتب لي"، إيه الفضول ده!!!
- معلش يا عم "لي" :) و بعدين إخنا مابنقولش أسرار يعني خليها عليك
- عشان خاطرك بس، إنت عارف غلاوتك. يلا بقي أسيبك و هاستني تدويناتك
- إن شاء الله إسبوعيا، أشوفك علي خير


الواد و "لي" أبو قلب أبيض زي عيال البلد،،،،،،