Custom Search
التكعيبة: Dec 25, 2009

Friday, December 25, 2009

و ابتدا ابتدا ابتداااااا....ابتدا المشوار

أخيرا و بعد طول تأجيلنا و مرارة انتظاركم.......نقدم لكم "التكعيبة" بمبمبمبماااااااااااااام (موسيقي تصويرية يعني).......ايه اللي انا بقولوه ده؟
معلش بقي يا جماعة اول محاولة ليا في عالم التدوين وبصراحة مش عارف ابدأ ازاي
ومش عارف برضه اذا كان التدوين ليه طقوس خاصة عشان الواحد يبدأه ولا ايه؟
يعني ممكن يكون ضروري للي ناوي يدخل العالم ده انه يودع أهله مثلا -اعذروني...جديد بقي و طول عمري بسمع انهم قبضوا علي مجموعة المدونين الفلانيين...و حملة أطلقوا سراح المدون الفلاني وهكذا- المهم اني أخيرا قررت أبدأ مدونتي
و في البداية بعد بسم الله الرحمن الرحيم أعرفكم بنفسي، أنا شاب مصري ابلغ من العمر واحد و عشرين ربيعا -حلوة ربيعا ديه- من عشاق قهوة التكعيبة بوسط البلد
و التكعيبة بالنسبالي مش قهوة بضيع فيها وقت فراغي.......لأني اصلا بتمني يبقي عندي شوية فراغ كدة و لو حتي حبة بربع و لكنها مكان التقي فيه من وقت لاخر بأشخاص أتفق معهم في وجهات نظر و أخرين أختلف معهم،
أقابل صديق قديم بعد ترتيبات و أخر بالصدفة، شخص أجله و أخر مقامه عندي الجزمة، الوطني و الهلاب، السلفي و الهلاس، الناصري و طبالين الحزب الوطني،مثقفين وشعراء وناس يدوب تفك الخط،
مليونيرات و عواطلية، فنانين و صحفيين ومدعين، أعمار مختلفة، أطياف لا تقل اختلاف.......
من الأخر كده التكعيبة بالنسبالي بورترية لمصر بدون مكياج. كل رواد التكعيبة مع نسمة الهوا العليلة في الصيف و كوباية الشاي بنعناع بتفك وبتقي علي طبيعتها خاااااالص و تتساقط أقنعتهم مع أخر بق في كوباية الشاي......و في الشتا و الناس هناك كمشانة من الساقعة مع كوباية كاكاو أو سحلب و مع أول بق يديلهم شوية دفا برضه تسقط أقنعتهم و تبدأ جلسات صراحة قد تنتهي بخناقة و أخري تنتهي براحة بال

كمية متناقضات غنية خليتني أصر اني أدونها بالاضافة لبعض مشاهداتي عموما و أشارككم فيه و تشاركوني برأيكم و وجهات نظركم




تابعونا...،
الواد أبو قلب أبيض زي عيال البلد